Samkvæmt því sem fram kemur í Samráðsgátt stjórnvalda þá vill Íslensk getspá, sem rekur meðal annars Lottó, fjölga tölunum í leiknum úr 40 í 42. Mun þá þurfa 5 réttar tölur af 42 til að vinna fyrsta vinning. Einnig vill fyrirtækið hækka verð á hverri röð úr 130 krónum í 150 krónur. Einnig vill fyrirtækið bæta einum vinningsflokki við en hann verður þrjár réttar tölur og bónustala.

Morgunblaðið hefur eftir Stefáni Konráðssyni, framkvæmdastjóra Íslenskrar getspár, að fyrirtækið hafi farið mjög hægt í breytingar á „lottómatrixunni eða kúlufjöldanum“. Síðast hafi þessu verið breytt 2008 en þá var kúlunum fjölgað úr 38 í 40. „Þá voru Íslendingar 315 þúsund en nú eru þeir um 370 þúsund. Við bara eltum íbúafjöldann,“ er haft eftir Stefáni.

Hann sagði að síðast hafi verðið verið hækkað 2013 en miðað við vísitöluverð ætti röðin að kosta um 170 krónur núna.