Framhaldsskólakennarinn og bloggarinn Páll Vilhjálmsson greinir frá því að hann hafi fengið kröfubréf frá lögmanni Þórðar Snæs Júlíussonar, ritstjóra Kjarnans, og Arnars Þórs Ingólfssonar, blaðamanns á miðlinum, þar sem honum er hótað lögsókn ef hann dragi ekki til baka ummæli um blaðamennina og biðjist afsökunar á þeim.
Páll hefur tjáð sig í gríð og erg um rannsókn Lögreglustjórans á Norðurlandi vestra á stuldi á síma Páls Steingrímssonar Samherjaskipstjóra og afritun á gögnum úr símanum. Hefur Páll hvað eftir annað sakað blaðamenn á RÚV, Stundinni og Kjarnanum um glæpsamlegt athæfi í tengslum við þessi atvik.
Ummælin sem þeir Kjarnamenn krefjast að Páll dragi til baka og biðjist afsökunar á eru eftirfarandi:
„Arnar Þór Ingólfsson og Þórður Snær Júlíusson, blaðamenn á Kjarnanum, […] eiga aðild, beina eða óbeina, að byrlun Páls skipstjóra Steingrímssonar og stuldi á síma hans.“
Það er Vilhjálmur H. Vilhálmsson lögmaður sem sendir kröfubréfið fyrir hönd þeirra Þórðar og Arnars. Páll segir í pistli sínum um þetta:
„Gögn frá lögreglu sýna að Arnar Þór og Þórður Snær eiga aðild, beina eða óbeina, að refsiverðu athæfi. Í væntanlegu sakamáli verður ákært á grunni sakamálaannsóknar, verjendur blaðamannanna færa rök fyrir sýknu og dómari úrskurðar. Þeir sem eiga málsaðild eru ákærðu, vitni og tjónþoli – Páll skipstjóri.
Ef ríkisstyrktur Kjarninn, Arnar Þór og Þórður Snær, stefna bloggara fyrir að birta sannindi er svo komið að þöggun er vopn blaðamanna. Frjáls umræða var einu sinni aðalsmerki blaðamanna. Nú er hún Snorrabúð stekkur.“
