Breiðablik hafði betur gegn KR á Meistaravöllum í Bestu deildinni í kvöld. Leikurinn var leikur tveggja hálfleika, KR-ingar fengu fullt af færum í fyrri hálfleik en inn vildi boltinn ekki. Jason Daði Svanþórsson kom Blikum yfir snemma í seinni hálfleik og náðu heimamenn ekki að skapa nóg til að jafna metin.

Rúnar Kristinsson, þjálfari KR, sagði í viðtali við Stöð 2 Sport að leik loknum að KR hefði verið miklu betra liðið í dag.

„Það var bara eitt lið á vellinum í dag, við vorum miklu betri og hefðum átt að skora 2-3 mörk í fyrri hálfleik og klára þennan leik þá en þegar þú nýtir ekki færin þín þá endar þetta oft svona. Þeir skora þetta eina mark og svo lágu þeir bara í vörn og beittu skyndisóknum og við náðum ekki að spila nægilega vel út úr því. Þeir voru þéttir til baka og við náðum ekki að skapa neitt mikið í seinni.“

„Við náðum ekki að skapa okkur nógu mikið til að jafna. Ég er bara ósáttur við markið sem þeir skora, mjög ósáttur ég held að þetta hafi verið hugsanlegt brot rétt fyrir markið og er pirraður yfir því. Það er svekkjandi að fá svona mark í andlitið, mér finnst að við eigum að fá brot þarna, „ sagði Rúnar við Stöð 2 Sport.

„Við vorum bara miklu betri en þeir og áttum að vinna,“ sagði Rúnar Kristinsson að lokum við Stöð 2 Sport.