„Ég hef einu sinni séð hann en það var við dómsuppkvaðninguna. Sem betur fer hef ég aldrei rekist á hann aftur. Einu sinni hélt ég að ég hefði séð hann og það var eins og ég væri kýld í magann. Það hafði mikil líkamleg áhrif á mig. Mér finnst hræðilega vont að sjá myndir af honum.

Ég reyni bara að hugsa sem minnst um þennan mann því þá líður mér illa, verð reið og bitur og sorgmædd. Ég hef ekki fyrirgefið honum og held að ég muni aldrei geta það. Ég hata engan en hann kemst kannski næst því. Ég hef aðallega andstyggð á honum.“

Áslaug Perla Kristjónsdóttir lést árið 2000 þegar henni var hrint niður af svölum blokkar í Engjahjalla. Systir hennar, Ragnheiður M. Kristjónsdóttir, segir fjölskylduna ekki hafa jafnað sig eftir missinn. Indíana Ása Hreinsdóttir ræddi við Ragnheiði um Áslaugu Perlu, daginn örlagaríka, fyrirgefninguna, ástina og sorgina eftir því sem hefði getað orðið.