Þegar haldið er af stað í frí liggur mörgum oft á að komast út úr húsi til að komast tímanlega út á flugvöll, í sumarbústaðinn eða þangað sem leiðin liggur hverju sinni. Það getur því verið ótrúlega erfitt að muna hvernig heimilið leit nákvæmlega út þegar það var yfirgefið og það getur stundum valdið hugarangri hjá fólki.

Hver kannast ekki við að vera farin(n) að heiman þegar hugsanir byrja að sækja á um hvort útidyrunum hafi verið læst? Slökktum við ljósin inni á baðherbergi? Hvort slökkt hafi verið á eldavélinni? Eða stendur húsið í björtu báli?

Þetta getur valdið óróleika í fríinu sem á nú að vera tími afslöppunar. Það er auðvitað ekki oft sem fólk gleymir að slökkva á eldavélinni en til að draga úr áhyggjum af því þá bendir Lifehacker á að að sé einfaldast að taka mynd af eldavélinni þegar verið er að yfirgefa húsið. Þá er einfaldlega hægt að kíkja á myndina í símanum til að fullvissa sig um að ekki hafi verið kveikt á henni þegar húsið var yfirgefið.

Það er líka hægt að nota þetta ráð varðandi önnur heimilistæki sem fólk gæti haft áhyggjur af þegar farið er að heiman.