Ásgeir Ásgeirsson – ljósmyndarinn Geiri X – hefur strítt við mikið heilsuleysi síðustu árin. Hann er með sjúkdóminn CRPS, sem er fjölþætt, svæðisbundið verkjaheilkenni. Sjúkdómurinn er afar sársaukafullur auk þess að ræna sjúklinginn mætti.

Kona Geira, Rósa Bragadóttir, greinir frá því á Facebook í kvöld að Geiri hafi verið lagður inn á bráðamóttökuna vegna verks fyrir hjarta. Vegna fyrri reynslu krefst Geiri þess að öll samskipti við lækna séu tekin upp á myndband en þetta olli vanda í kvöld. Gefum Rósu orðið:

„Geiri mættur aftur á spítala, með verk fyrir hjartanu – var borinn niður af þriðju hæð og í sjúkrabíllinn. Vegna fyrri reynslu vill hann að öll samskipti við lækna séu tekin upp á myndband, enda Landspítalinn áður reynt að ljúga á sjúkraskýrslum til að komast undan skaðabótaskyldu gagnvart honum. Fyrsti læknir sem heyrði þetta strunsaði beinustu leið út með þvílíkum dónaskap, og sagðist ekki muna sinna honum. Hvað hefur fólk að fela? Það er ekki eins og þetta beinist að læknunum sjálfum persónulega, heldur sjúkrastofnuninni sem þeir vinna fyrir og er ábyrg fyrir þeirra gjörðum gagnvart sjúklingum.“

Rósa segir í samtali við DV að annar læknir og framkvæmdastjóri skrifstofu forstjóra hefðu komið og rætt við þau Geira og hana. Niðurstaðan var að leyfa myndbandsupptöku „í þessu einstaka tilfelli“ eins og það var orðað.