Ragnheiður Inga Matthíasdóttir, 14 ára Akureyringur, sigraði Rímnaflæði 2021 með laginu „Mætt til leiks.” Nú fylgir hún sigrinum eftir með nýju lagi sem heitir einfaldlega „Bla bla bla.”

„Lagið er um hvernig það er að vera unglingur í dag, bodyshaming, eitruð vinasambönd og síma-veruleikann,” segir Ragnheiður og bætir við „Það er líka virkilega gaman að vera unglingur og mikið að skemmtilegum tækifærum, ég hvet alla unglinga til að vera skapandi.”

Ragnheiður, einnig þekkt sem Ragga Rix, er nýlega komin aftur heim til Akureyrar eftir að hafa dvalið í fjóra mánuði á Tenerife með fjölskyldu sinni.

„Ég samdi lagið þar, fór í stúdíó og gerði myndbandið þar líka. Það er gaman að koma heim til Akureyrar aftur. Það er það skemmtilega við ferðalög, að fara og upplifa eitthvað nýtt og spennandi, og koma svo aftur heim með nýjar hugmyndir.“

Sem sigurvegari Rímnaflæðis kemur hún fram á Samfestingnum, stærsta balli Samfés á ári hverju sem haldið verður 29.-30.apríl.

Frá 2001 hefur SamFestingurinn verið haldinn í Laugardalshöllinni þar sem aðrir staðir voru sprungnir vegna fjölda ungmenna. Síðustu ár hafa mætt um 4500 ungmenni, um 30% unglinga landsins, alls staðar að af landinu og fulltrúar 120 félagsmiðstöðva, ásamt 300-400 starfsmönnum. Eðlilega er Ragnheiður spennt fyrir þessu.

„Ég er sjálf alveg að tryllast úr spenningi fyrir þeim viðburði. Svo eru fleiri gigg framundan, og ég er alltaf að skrifa og reyna að bæta mig í rappinu. Svo er ég líka með augun opin fyrir fleiri skemmtilegum tækifærum.“

Ragga Rix sigraði Rímnaflæði – 13 ára rappar um að vera þreytt á typpamyndum – Myndband