Mikil ólga hefur verið í samfélaginu eftir að ríkissjóður seldi stóran hlut í Íslandsbanka nýlega. Salan fór nánast fram í skjóli nætur og var sveipuð miklum leyndarhjúp. Í vikunni var listi yfir kaupendur birtur og ekki hefur það slegið á ólguna. Rætt hefur verið um að ríkið hafi selt hlut sinn of lágu verði og að fáir útvaldir hafi fengið að koma að kaupum á hlut ríkisins.

Einn þeirra sem keypti hlut í bankanum er Jakob Valgeir Flosason fagfjárfestir, en hann keypti fyrir tæplega milljarð í útboðinu. Í samtali við Fréttablaðið sagði hann að það að kaupendalistinn hafi verið opinberaður hreyfi ekki mikið við honum, hann sé orðinn öllu vanur.

En á hinn bóginn sagðist hann hafa meiri áhyggjur af því verði sem ríkið fékk fyrir sinn hlut, algjör óþarfi hafi verið að gefa svo mikinn afslátt: „Ef menn vilja gagnrýna eitthvað þá ættu þeir að horfa á verðið sem ríkið seldi á. Að mínu mati hefði ríkið átt að selja til fárra en öflugra kjölfestufjárfesta, eins og talað var um í upphafi. Það var ekki gert. Í staðinn voru það aðallega lífeyrissjóðirnir sem pressuðu verðið niður í þessar 117 krónur á hlut. Ég veit það fyrir víst að ríkið hefði getað selt á genginu 122 ef þeir hefðu einbeitt sér að þeim sem voru tilbúnir til að borga meira. Það er það sem mér finnst alvarlegt í þessu.“

Hann vildi sjálfur kaupa mun stærri hlut í bankanum en hann fékk: „Ég er einfaldlega þeirrar skoðunar það sé bankanum fyrir bestu að nokkrir öflugir fjárfestar komi inn af krafti og veiti honum aðhald. Þannig gæta þeir best sinna hagsmuna og hagsmuna bankans um leið. Það var það sem vakti fyrir mér. Þá hefði líka þjóðin fengið meira fyrir sinn snúð.“

Nánar er hægt að lesa um málið í Fréttablaðinu í dag.