Jóhannes Viðar Bjarnason, eigandi Fjörukrárinnar, hefur keypt eignina á Víkingastræti 2 þar sem Gaflaraleikhúsið er nú til húsa. Hann ætlar að láta rífa húsið og stækka við Víkingahótelið. Fjarðarfréttir greindu frá þessu.

Jóhannes segir í samtali við DV hans markmið sé ekki síst að fegra miðbæinn og byggja upp í átt við það útlit sem einkennir víkingaþorpið svokallaða.

Húsið að Víkingastræti 2 var byggt 1920. „Það er vitað að þetta hús er úr sér gengið,“ segir hann. Þarna hafi verið verksmiðja áður en leyfi var veitt fyrir leikhúsinu.

Jóhannes hefur þegar sótt um deiliskipulagsbreytingu vegna niðurrifsins og nýrrar viðbyggingar en skipulags- og byggingarráð tók neikvætt í þær hugmyndir sem þá voru lagðar fram. Hann segir að þetta hafi aðeins verið ein tillaga og segist ótrauður ætla að halda áfram og koma með nýja tillögu þar til hann fær samþykkt.

„Við erum að koma með tillögu að hótelbyggingu,“ segir hann en hugmyndin er að bæta við 50 herbergjum.

Núverandi leigusamningur rennur út  í júní á næsta ári og vonast Jóhannes til að þá verði hægt að hefjast handa.

Þá bendir hann á að bæjarstjórnarkosningar séu í vændum og hann treysti því að nýir bæjarfulltrúar sem koma þá inn hafi hug á að hlúa betur að þessum hluta Hafnarfjarðar sem í raun sé hjarta bæjarins.