Flugvél frá þýska flugfélaginu Lufthansa hóf flug frá Frankfurt í morgun og var á leið til Dallas í Bandaríkjunum. Þegar vélin var komin út á Atlantshaf tók hún hvassa beygju til hægri í átt að Íslandi. Samkvæmt upplýsingum Vísis þurfti flugvélin að óska eftir neyðarlendingu á Keflavíkurflugvelli vegna reyks um borð.
Upplýsingafulltrúi Isavia segir í samtali við Vísi að viðbúnaður hafi verið töluverður en útkallið er merkt rautt samkvæmt litakóða. Slökkvilið mætti á flugvöllinn og tók á móti vélinni. Flugvélinni hefur nú verið lent en upplýsingafulltrúinn gat ekki gefið meiri upplýsingar að svo stöddu.
DV hafði samband við höfuðstöðvar Lufthansa í Þýskalandi og spurðist fyrir um ástæðu nauðlendingarinnar. Ekki eru komin svör við þeirri fyrirspurn en fréttin verður uppfærð þegar þau berast.
Uppfært 13:05:
Blaðamaður náði tali af talsmanni Lufthansa í Þýskalandi en hann sagði að flugvélin hafi beygt til Keflavíkur af öryggisástæðum.
„Mér skilst að það hafi bara komið upp tilkynning um reyk, það er ástæðan fyrir því að þeir tóku ákvörðunina um að beygja til Keflavíkur. Öryggið er alltaf í fyrsta sæti,“ sagði talsmaðurinn í samtali við DV.
Þá sagði hann að vélin hafi náð að lenda með eðlilegum hætti og að það sé í lagi með alla um borð. Nú sé verið að fara yfir flugvélina til að sjá hvað er að.
