Glerverksmiðjan Samverk á Hellu, Trésmiðjan Börkur Akureyri, Gluggasmiðjan Selfossi og Sveinatunga hafa nú sameinast undir einu merki: Kambar. Sameiginlega verður þetta fyrirtæki einn stærsti framleiðandi á gluggum, hurðum og gleri á Íslandi með um 2,5 milljarða í veltu og starfsemi á fimm stöðum á landinu.
Kristján Geir Gunnarsson er nýráðinn framkvæmdarstjóri sameinaðs rekstrar þessara félaga. ,,Með því að þessi rótgrónu fyrirtæki sameinist undir einn hatt myndast slagkraftur til að keppa við innfluttning á bygginarvörum sem þessi fyrirtæki framleiða. Innan þessara fyrirtækja er mikil þekking á íslenskum byggingamarkaði sem hefur byggst upp í tugi ára. Allar vörur þeirra eru sérstaklega þróaðar fyrir íslenskar aðstæður og afgreiðslutími er mun skemmri vegna nálægðar við markaðinn. Kolefnissporið er lægra svo hægt er að tryggja minna kolefnisspor í byggingariðnaðinum með innlendri framleiðslu með grænni orku,” segir Kristján Geir um sameininguna.
,,Kambar framleiða vörur í hæsta gæðaflokki fyrir krefjandi íslenskar aðstæður. Vörurnar byggja á íslensku verklagi og framúrskarandi hugviti. Við framleiðum umhverfisvænar vörur sem eru til hagsbóta fyrir umhverfið og samfélagið. Ég hef sérstaklega áhuga á að leiða metnaðarfulla sýn Kamba sem er að verða umhverfisvænasti framleiðandi glugga, glers og hurða í heiminum og loka þannig húsinu á umhverfisvænasta máta sem til er,” segir Kristján Geir ennfremur.
