Ingi Vífill Guðmundsson er eigandi streymisþjónustufyrirtækis en hann segir internetið og rafmagnið í kirkjum landsins ekki vera nógu gott til að hægt sé að tryggja gott streymi frá athöfnum. Frá þessu segir Ingi í pistli sem birtist á Vísi í dag.

Í pistlinum segir Ingi að mikil aukning hafi orðið á að jarðarförum og minningarathöfnum sé streymt á internetið. „Í kjölfar COVID-19 faraldursins var það af nauðsyn sökum samkomutakmarkanna, en nú er sífellt algengara að þeim sé streymt fyrir þá sem ekki eiga heimangengt sökum heilsu, aldurs eða veðurs, og eru þá ógleymdir aðstandendur sem búa erlendis eða utan borgarmarkanna,“ segir hann.

Ingi fagnar þessari þróun og segir hana jákvæða. „Enda bæði atvinnuskapandi og jákvæð í ljósi breyttra tíma þar sem áhersla á stafræna miðlun er í veldisvexti,“ segir hann.

Ekki netaðgengi og óljós aðgangur að rafmagni

Ljóst er þó að margt má bæta til að hægt sé að tryggja að hægt sé að streyma almennilega frá kirkjum hér á landi. Ingi bendir á að aðgengi að neti og rafmagni sé ekki nógu gott þar „Þó er einn þáttur sem staðið hefur í stað frá byrjun faraldurs en það er aðstaða og netaðgengi til streymis í kirkjum landsins,“ segir hann.

„Með fáum framsýnum undantekningum (grínlaust töldum á fingrum annarrar handar!) er aðstaðan til streymis hjartnær alls staðar ófullnægjandi. Víðast hvar í kirkjum er ekki aðgengt að interneti, víða er takmarkaður og óljós aðgangur að rafmagni, og víða hefur rafmagn ekki verið uppfært frá byggingu kirkjunnar.“

Ingi bendir á að hann og aðrir þjónustuaðilar í streymi séu að þjónusta hundruði eða jafnvel þúsundir manna í einu. „Okkar hlutverk er að veita óaðfinnanlega þjónustu á viðkvæmri stund hjá aðstandendum. Þessari ábyrgð fögnum við og tökum henni af einurð.“

Þá ber hann þetta slæma aðgengi saman við að búið væri að kvikna í kirkjuorgelinu í miðjum sálmi. „En rétt eins og organistinn, sem getur ekki klárað sálminn ef það af einhverjum ástæðum kviknar í orgelinu í miðjum sálmi, eru líkurnar á vel heppnaðri útsendingu hverfandi ef bæði rafmagn er óáreiðanlegt og netsamband stopult eða ekki til staðar.“

Vonar að kirkjurnar bæti aðstöðuna

Undir lok pistilsins hvetur Ingi kirkjurnar til þess að laga þetta. „Við þjónustuaðilar gerum okkar besta og gerum það yfirleitt vel. En rétt eins og organistinn getur ekki tekið ábyrgð á að brunnið orgel hljómi illa, getum við ekki tekið ábyrgð á að innviðir kirkja séu, árið 2022 (!), þannig að ekki sé hægt að veita þjónustu sem krefst jafn sjálfsagðrar aðstöðu sem áreiðanlegs rafmagns og stöðugrar internettengingar,“ segir hann.

„Þessi pistill er skrifaður með þá von að framkvæmdaráð kirkja nær og fjær taki þessi mál höndum tveim í sinni heimasókn. Oftast er þetta lítil framkvæmd þannig að allir geti vel við unað.“