Maxar Technologies birti í nótt nýjar myndir af 64 kílómetra löngu rússnesku herflutningalestinni sem hefur verið nærri Kyiv dögum saman, lengst af án þess að hreyfast úr stað. Nýju myndirnar vekja upp áhyggjur hjá mörgum um hvað sé nú að fara að gerast.

Á myndunum sést skemmd brú í Irpin, sem er sunnan við Antonov flugvöllinn sem er skammt frá Kyiv. Einnig sjást mörg farartæki á myndunum. Það getur bent til þess að lestin sé nú farin af stað á nýjan leik og sé aðeins nokkra kílómetra frá Kyiv. Það getur þýtt að stórfelld árás sé í uppsiglingu á höfuðborgina sem Rússar vilja gjarnan ná á sitt vald.

Í herflutningalestinni eru mörg þúsund hermenn, brynvarin ökutæki, skriðdrekar, stórskotalið og fleiri hernaðartól.