Það var úkraínski stjórnmálamaðurinn Anton Heraschenko sem skýrði frá þessu og birti símtölin að sögn The Sun. Í þeim heyrist að hermönnunum er illa brugðið við að sjá „svona mörg lík“ og margir grátbiðja um að fá að fara heim.
Sumir heyrast segja ættingjum sínum að stríðið geti staðið yfir mánuðum saman þrátt fyrir yfirlýsingar Vladímír Pútín, Rússlandsforseta, um að því ljúki á tveimur vikum (sem eru næstum liðnar).
Einn hermaður heyrist segja að herdeild hans sé matarlaus og hafi þurft að stela mat úr stórmörkuðum.
„Við erum ekki með neinar flugvélar, engan stuðning, við erum eins og fallbyssufóður,“ segir einn rússneskur hermaður í einni upptökunni og bætir við að félaga hans hlakki til að stríðinu ljúki því það „að berjast að ástæðulausu hafi gert menn klikkaða“.
Á annarri upptöku segir fótgönguliði að herdeild hans standi frammi fyrir „slátrun“ og að félagar hans „skjálfi“, „séu hræddir“ og neiti að berjast.
Enn einn hermaðurinn hringdi í eiginkonu sína og sagðist ekki skilja af hverju hefði verið ráðist á Úkraínu. „Við verðum örugglega hér fram í maí, það er öruggt,“ sagði hann og bætti við að stríðið geti staðið yfir árum saman.
Einn sagði að þeir fengju há laun á rússneskan mælikvarða fyrir að berjast í Úkraínu en að öllum standi á sama um það núna og sagði að félagar hans vilji hætta í hernum. „Við erum að verða uppiskroppa með dísilolíu og höfum lítið af skotfærum. Ég veit ekki hvað í fjandanum við getum gert,“ sagði hann.
