Frétt Morgunblaðsins þess efnis að Jón Gunnarsson dómsmálaráðherra hefði skotið skjólshúsi yfir landflótta mæðgin frá Úkraínu hefur vakið gífurlega athygli.
Ekki aðeins hafa margir landar dáðst að þessu framtaki ráðherrans heldur hafa margir lýst yfir óánægju með umfjöllun um málið sem þeim þykir vera áróðurskennd.
Vefur Hringbrautar tekur saman þessa umræðu. Það kemur fram að Kolbrún spyr á Twitter: „Hefði hann boðið þeim inn ef þau væru múslimar eða með annan húðlit?“
„Var einmitt að hugsa hversu skítt það væri að nota þetta stríð og eymdina sem er að skapast til að plögga fyrir næstu kosningar og hylma yfir karlpungaviðhorfið í kynferðisbrotamálum,“ skrifar Sigrún.
Sóley Tómasdóttir er ekki að skafa utan af því þegar hún skrifar: „Mér er svo misboðið að ég veit ekki hvar ég á að byrja.“
„Ég vona innilega að eitthvert ykkar hafi opnað heimili sín fyrir flóttamönnum,“ skrifar Ragna hins vegar.
Mjög lífleg skoðanaskipti eru síðan um málið í ummælakerfinu undir frétt Hringbrautar. Þar segir Ólafur Guðmundsson:
„Hvaða mannvonska er þetta eiginlega. Jón Gunnarsson sýndi ekkert annað en manngæsku og velvilja með því að bjóða þetta fram þar sem hann hafði aðstöðu til þegar eftir var leitað. Sama hefur verið rætt á mínu heimili ef beiðnin og þörfin kemur og ég veit um vini mína í Þýskalandi sem eru ásamt löndum sínum þar að pakka saman fötum, sængurfötum, teppum o.fl. til að senda til landamæra Póllands og Úkraínu. Þeir sem eru að gagnrýna þetta ættu frekar að bjóða og gefa, en að gagnrýna þá sem það gera. Væri ekki ráð að telja upp hvað þeir hinir sömu hafa boðið fram, áður en farið er að hjóla í þá sem hafa lagt sitt að mörkum !!! Sóley Tómasdóttir gæti t.d. byrjað á því svo að hún fái málið aftur“
