Roman Abramovich, eigandi Chelsea, hefur ákveðið að selja félagið. Hann mun hlusta á tilboð í félagið.

Þetta kemur í kjölfar innrásar Rússa í Úkraínu. Abramovich er Rússi. Hann var áður mikill vinur Vladimir Putin, forseta Rússlands. Hann hafnar því þó að þeir séu félagar í dag.

Á dögunum var greint frá því að Abramovich hafi skilið við Chelsea tímabundið en nú er ljóst að hann mun selja félagið endanlega. Hann er talinn hræðast refsiaðgerðir Breta.

Breska götublaðið The Sun tók saman fjögurra manna lista yfir hugsanlega arftaka Abramovich.

Sir Jim Radcliffe (metinn á 6,33 milljarða punda)
Var ríkasti maður Bretlands árið 2018 en fjárhagur hans hefur aðeins dalað síðan. Radcliffe er stuðningsmaður Manchester United og hefur áður verið orðaður við kaup á félaginu. Nú gæti farið svo að hann kaupi Chelsea.

Todd Boehly (metinn á 4 milljarða punda)
Var orðaður við kaup á Chelsea árið 2019. Hann á LA Lakers og LA Dodgers ásamt LA Sparks.

Hansjorg Wyss (metinn á 4 milljarða punda)
Sagði frá því þegar orðrómar voru um að Abramovic myndi hverfa á braut að honum hafi boðist að kaupa félagið. Það gæti orðið að veruleika.

Stephen Ross (metinn á 6 milljarða punda)
Var virkur liður í að reyna að koma Ofurdeild Evrópu á laggirnar og er því nokkuð umdeildir. Hann á Miami Dolphins í NFL-deildinni vestanhafs sem og Hard Rock-völl þeirra.