Björn Ingi Hrafnsson, ritstjóri Viljans, greinir frá því í færslu á Facebook-síðu sinni að hann sé orðinn gjaldþrota.

„Það er kannski við hæfi, nú þegar akkúrat 13 ár eru í dag frá því vefmiðillinn Pressan hóf göngu sína, að segja hér frá því að í síðustu viku fór ég í persónulegt gjaldþrot vegna mála sem tengjast fjölmiðlarekstrinum fyrir nokkrum árum og hafa verið mér þungur baggi að bera um árabil. Það er ekkert skemmtilegt, en nauðsynlegt úr því sem komið var. Þetta er bara staðan, ég var í allskonar persónulegum ábyrgðum og maður verður að taka ábyrgð á eigin gjörðum, mistökum sem voru gerð og horfast í augu við staðreyndir. Peningar eru ekki allt og mikilvægast er að vera til staðar fyrir fólkið sitt og halda heilsu,“ skrifar Björn Ingi.

Hann segist hafa tapað öllum sínum eigum á þessu ævintýri en ætla að byrja með hreint borð, reynslunni ríkari.

„Er eftir margra ára varnarbaráttu orðinn málkunnugur fleiri lögfræðingum og stefnuvottum en gott getur talist, þótt flest sé það mikið sómafólk og bara að vinna vinnuna sína, og það verður kannski bara frelsi að setja þetta dæmi alltsaman á bak við sig. Ég ætla áfram bara að vera Björn Ingi á Viljanum, held kannski áfram að skrifa bækur, sinna ýmsu fleiru, vera allsgáður, rækta líkama og sál og taka þátt í þjóðmálaumræðunni meðan einhver nennir að hlusta á það og vona eins og aðrir að veröldin sé ekki á barmi kjarnorkustyrjaldar. Með þessari færslu vildi ég láta ykkur vita sjálfur, því það er best að koma til dyranna eins og maður er klæddur.“