Rætt var við Mikhaíl V. Noskov, sendiherra Rússlands á Íslandi, í fréttum RÚV í kvöld. „Forseti Rússlands hefur oft lýst því yfir að ekki verði ráðist inn í Úkraínu. Í morgun lásum við að það væri byrjað stríð þar. Hvað breyttist?“ spyr fréttamaður RÚV sendiherran sem svarar beittur og segir að ekki sé um innrás að ræða.
„Þetta er alls ekki innrás á yfirráðasvæði Úkraínu. Þið vitið hvaða atburðir leiddu til þessarar ákvörðunar Pútíns forseta. Hann vísaði til sérstakra aðstæðna rússneskra borgara þann 22. febrúar. Þar sagði hann frá áætlunum vegna aðstæðna í Úkraínu og fjallaði ítarlega um hvað gerst hefði í Úkraínu síðastliðin átta ár.“
Noskov er þá spurður hvort Rússland óttist þær refsiaðgerðir sem tilkynnt hefur verið um í dag. Því svarar hann neitandi. „Nei, við höfum vanist slíku og höfum lifað við refsiaðgerðir, ekki aðeins frá 2014 heldur einnig á Sovéttímanum, á áttunda áratugnum, á níunda áratugnum,“ segir hann.
„Efnahagur okkar hefur aðlagast vel refsiaðgerðum síðustu átta ára. Þessar refsiaðgerðir sem nú eru framundan gætu vissulega haft áhrif á rússneskan efnahag en ég bendi á að þær hafa meiri áhrif á ríkin sem beita þeim.“
