Meðlimur Sinfóníuhljómsveitar Íslands er kominn í ótímabundið leyfi frá störfum eftir ásakanir um áreitni samkvæmt áreiðanlegum heimildum DV.
DV leitaði viðbragða framkvæmdastjóra Sinfóníuhljómsveitarinnar, Láru Sóleyjar Jóhannsdóttur, vegna málsins en hún kvaðst þó ekki geta tjáð sig um einstök mál.
„Ég get ekki tjáð mig um eintök mál.
Þegar að upp koma ásakanir eða ábendingar um meint einelti, áreitni eða ofbeldi tökum við slíku alvarlega og fylgjum stefnu og viðbragðsáætlun hljómsveitarinnar í þeim efnum“
Vísaði Lára að öðru leyti í stefnu Sinfóníuhljómsveitarinnar gegn einelti, kynferðilegri eða kynbundinni áreitni og ofbeldi á vinnustað. Þar kemur meðal annars fram að stefnan eigi við um samskipti sem eigi sér stað á vinnustaðnum, um samskipti í gegnum tölvu, síma eða önnur fjarskiptatæki, á skemmtunum á vegum vinnustaðarins, starfsmannafélagsins eða í vinnuferðum. Eins geti líka komið til álita að fjalla um athafnir utan vinnustaðarins ef þær eru til þess fallnar að hafa áhrif á samskipti aðila á vinnustaðnum.
Viðbragðsáætlun sé svo virkjuð þegar kvörtun eða ábending hefur borist en slíku skuli alltaf taka alvarlega.
