Þóra Arnórsdóttir, ritstjóri Kveiks, segist lítið geta tjáð sig um sakamálarannsókn Lögreglunnar á Norðurlandi eystra vegna meints þjófnaðar á síma Páls Steingrímssonar, skipstjóra hjá Samherja, og afritunar á gögnum úr honum.

Stundin og Kjarninn birtu ítarlegar fréttir í vor byggðar á gögnum þar sem Páll ásamt tveimur öðrum aðilum, tengdum Samherja, ræða um aðila sem þeir telja óvinveitta fyrirtækinu.

Fjórir blaðamenn, tveir á Kjarnanum, einn og Stundinni og einn á RÚV, þ.e. Þóra, hafa verið kölluð til yfirheyrslu vegna málsins og hafa réttarstöðu sakbornings.

Aðalsteinn Kjartansson á Stundinni og Þórður Snær Júlíusson á Kjarnanum hafa tjáð sig um málið og furðað sig á tilburðum lögreglunnar. Segjast þeir vera sekir um að skrifa fréttir og segja fokið í flest skjól fyrir íslenska blaðamennsku ef slíkt varði við lög.

Það vekur sérstaka athygli að Þóra hafi stöðu sakbornings í málinu þar sem RÚV birti engar frumunnar fréttir upp úr umræddum gögnum. Aðalsteinn Kjartansson var hins vegar starfsmaður við Kveik og færði sig yfir á Stundina um það leyti sem þessir atburðir urðu.

„Ég fékk náttúrulega bara samskonar símtal þar sem mér er gefið að sök að hafa brotið gegn friðhelgi einkalífs og ég ætla ekki að tjá mig frekar um það, að öðru leyti en því að ég hef engin lög brotið. Svo mæti ég bara sallaróleg í þessa skýrslutöku.“

Aðspurð segir Þóra að ekki hafi verið útlistað fyrir henni hvað hún er nákvæmlega grunuð um fyrir utan að hafa brotið lög um friðhelgi einkalífs. Ekki hafi komið fram í hverju sá verknaður eigi að vera fólginn. Að sögn Þóru verður hún yfirheyrð á mánudaginn.