Það stefnir í erfiða helgi hjá uppstillinganefnd Framsóknarflokksins í Reykjavík. Samkvæmt heimildum Orðsins mun nefndin koma saman um helgina og leggja drög að lista flokksins fyrir komandi borgarstjórnakosningar og er að mörgu að hyggja.
Aðalhausverkurinn felst í því hverjum verði treyst til þess að sitja í oddvitasætinu en tveir spennandi valkostir standa til boða.
Eins og Orðið greindi frá í gær (nánast síðast allra miðla sem er óvenjulegt og í raun bara mjög erfitt að horfast í augu við) þá hyggst sjónvarpsmaðurinn Einar Þorsteinsson, sem ráðgerir flutning til Reykjavíkur ásamt fjölskyldu sinni, gefa kost á sér í oddvitasæti listans.
Óhætt er að fullyrða að Einar er afar frambærilegur frambjóðandi og í raun og veru hvalreki fyrir Framsóknarflokkinn ekki síst vegna þess að í því felst náttúruvæn endurvinnsla, frá tímum oddvitans Einar Skúlasonar, sem höfðar mjög til kjósenda eins og spéfuglinn og frambjóðandinn Stefán Pálsson benti á.
https://t.co/rcxyrMmzkz – Þetta væri rökrétt ákvörðun. Með þessu móti gætu Framsóknarmenn í borginni nefnilega endurnýtt gömlu barmmerkin með slagorðinu: „Þú meinar Einar“. #hringrásarhagkerfið
— Stefán Pálsson (@Stebbip) February 10, 2022
Frambjóðandahvalreki eru fátíð hlunnindi, sérstaklega í Framsóknarflokknum, og því réðu menn þar á bæ sér ekki fyrir kæti þegar framboð Einars bættist við óvænt framboð landsliðsmarkvarðarins Björgvins Páls Gústavssonar sem gaf kost á sér í 1-2.sæti listans.
Lausnin lá í raun í augum uppi að mati Framsóknarmanna – Einar færi í gullslegið oddvitasætið en Björgvin Páll myndi stilla upp Framsóknarsilfri við hlið silfurmedalíunnar frá Peking 2008 og hálftómri dollu af Silver hárgeli.
Þar vanmátu Framsóknarmenn hinsvegar keppnisskap og metnað Björgvins Páls sem samkvæmt heimildum Orðsins er ekki vitund ögn spenntur fyrir að þeirri hugmynd að sætta sig við 2.sætið baráttulaust. Í hans augum er Einar bara í sama flokki og Karabatic og Björgvin er vanur því að reyna að vera fyrir slíkum mönnum og víkur hvergi sama hverju er að honum grýtt. Þá hafa Reykvíkingar jú oftar fagnað afrekum hans á skjánum en afrekum Einars á sama skjá.
Formaður uppstillingarnefndarinnar er Lárus Sigurður Lárusson, lögmaður og fyrrum frambjóðandi, og hann er eflaust með nagandi kvíða fyrir helginni.
