Rapparinn Kanye West hótar að hætta við að koma fram á Coachella tónlistarhátíðinni ef söngkonan Billie Eilish biður ekki Travis Scott afsökunar. Travis Scott er rappari og barnsfaðir raunveruleikastjörnunnar Kylie Jenner.
Kanye vill að Billie biðst afsökunar vegna ummæla sem hún lét falla á tónleikum nýlega, en hann telur ummælin tengjast Astroworld harmleiknum, þegar átta manns létust á tónleikum Travis Scott.
Kanye lýsti þessu yfir í færslu á Instagram, sem er öll skrifuð í hástöfum.
„Kommon Billie við elskum þig, viltu vinsamlegast biðja Travis afsökunar og fjölskyldu þeirra sem létust. Enginn vildi að þetta myndi gerast, Travis hafði ekki hugmynd um það sem var að gerast þegar hann var á sviði og hann var mjög leiður yfir því sem gerðist og já Travis verður með mér á Coachella, en nú þarf ég að fá Billie til að biðjast afsökunar áður en ég kem fram á hátíðinni,“ segir hann.
Travis Scott átti upphaflega að vera meðal þeirra sem kæmu fram á Coachella en eftir Astroworld fengu skipuleggjendur hátíðarinnar söngkonuna til að koma í hans stað.
Billie lét umrædd ummæli falla þegar hún stöðvaði tónleika hjá sér til að hjálpa tónleikagesti. Hún sagði við áhorfendur: „Ég bíð eftir að fólk sé í lagi áður en ég held áfram.“
Margir héldu að hún væri með þessu að beina spjótum sínum að Travis og gagnrýna hann. Nokkrir fjölmiðlar erlendis greindu frá því en Billie neitar að hafa verið að tala um Travis.
„Ég bókstaflega sagði ekki orð um Travis, ég var bara að hjálpa aðdáanda,“ sagði Billie í svari sínu til Kanye.
