Guðrún Ýr Eðvaldsdóttir matar- og sælkerabloggari heldur úti síðunni Döðlur og smjör er iðin að koma bragðlaukunum á flug og veit fátt skemmtilegra en að útbúa kræsingar fyrir fjölskyldu sína.

Hér er á ferðinni ótrúlega léttur og bragðgóður kjúklingaréttur úr smiðju hennar, þar sem auðvelt er að leika sér með hráefnin og krydda aukalega með hráefnunum eftir á með chili, límónu og kóríander hver eftir sínu höfði. Brögðin minna örlítið á sumarið sem er góð tilfinning á þessum árstíma á meðan vetur konungur lætur að sér kveða.

Chili límónu kjúklingur

Fyrir 3

1 pk úrbeinuð kjúklingalæri

1 stk. safinn úr límónu

1 stk. börkur af límónu

3 msk. ólífuolía

2 hvítlauksgeirar

1 tsk. salt

1 tsk. hunang (eða önnur sæta)

2 tsk. Tabasco Sriracha sósa

1 tsk. cumin

handfyllir kóríander

Afþíðið kjúklinginn og fituhreinsið ef þið viljið. Mælið hráefnin og skerið niður kóríander, þá er öllu blandað saman í skál, hrært vel saman og lok eða plast sett yfir. Leyfið kjúklingnum að marínera í minnst 1-2 tíma, best að leyfa honum að liggja í dágóðan tíma ef það er möguleiki.

Hitið ofninn í 180°C. Raðið kjúklingnum í eldfast form og eldið í 15-20 mínútur.

Maís & ananas hrísgrjón

200 ml hrísgrjón

400 ml vatn

2 msk. smjör

1 maís eða lítil dós maís

3 msk. ananas

pipar eftir smekk

Soð af kjúklingnum

Sjóðið hrísgrjónin með vatni þangað til þau eru full soðin. Takið pönnu og bræðið smjör, skerið maísbitana frá stilknum og ananasinn smátt niður og bætið út á pönnuna. Hellið síðan soðinu sem myndast hefur af kjúklingnum út á pönnuna ásamt hrísgrjónunum og hrærið þessu vel saman. Piprið eftir smekk.

Berið fram með meiri kóríander, límónu og Sriracha sósu.