Slæmt andrúmsloft og vinnuaðstæður á skrifstofu Eflingar voru mikið til umræðu í haust í aðdraganda og í kjölfar þess að Sólveig Anna Jónsdóttir sagði af sér formennsku hjá félaginu. Sálfræði og ráðgjafarstofan Líf og sál var því fengin til að gera úttekt á vinnustaðnum og voru niðurstöður rannsóknarinnar kynntar á starfsmannafundi nú í morgun. Segja má að skýrslan hafi verið svört en meðal annars kemur þar fram að fyrrverandi framkvæmdastjóri félagsins og hægri hönd Sólveigar, Viðar Þorsteinsson, hafi verið fundinn sekur um einelti og kvenfyrirlitningu gegn starfsfólki skrifstofunnar. Vísir greinir frá.

Samkvæmt frétt Vísis var dregin upp svört mynd af stjórnarháttum Viðars í skýrslunni, sem og Sólveigar. Hafi stjórnarhættir batnað mikið eftir að þau hurfu frá störfum og ný forysta tók við. Byggir úttektin á viðtölum við hátt í fimmtíu starfsmenn skrifstofunnar, en ekki var gerð sérstök eineltisúttekt.

Mat sálfræðistofunnar eftir viðtölin er að framkoma Viðars við nokkra undirmenn sína flokkist sem vinnustaðaeinelti og eins hafi hann gerst sekur um kvenfyrirlitningu.

Þar kemur eins fram að starfsfólk hafi margoft leitað til Sólveigar Önnu og kvartað undan Viðari en hún hafi ekki brugðist við þeim kvörtunum.

Um er að ræða úttekt sem unnin var af óháðum aðila og átti alltaf að kynna niðurstöðurnar fyrir starfsmannahóp um mánaðamótin janúar/febrúar. Vísir leitað til núverandi forystu Eflingar sem vildi ekki tjá sig um málið en vísaði tl þess að von væri á tilkynningu.