Sigríður Á. Andersen, fyrrverandi dómsmálaráðherra, telur að lagaforsendur sóttvarnaaðgerða séu ekki lengur fyrir hendi. Hún bendir á að samkvæmt þriðju málsgrein 12. greinar sóttvarnalaga sé kveðið á um að ekki megi beita sóttvarnaráðstöfunum nema brýna nauðsyn krefji til að vernda líf og heilsu fólks og að við beitingu ráðstafana skuli gæta meðalhófs og jafnræðis og taka tillit til annarra verndarhagsmuna.

Morgunblaðið skýrir frá þessu í dag. „Mér hefur fundist mjög mikið hafa skort upp á raunverulega rannsókn á sóttvarnaaðgerðum, bæði áður en gripið er til þeirra og einkum og sér í lagi eftir að þeim er aflétt, þannig að hægt verði að leggja mat á það hvort þessar aðgerðir hafi skilað raunverulegum árangri,“ er haft eftir henni.

Hún benti á að með tilkomu Ómíkronafbrigðisins hafi innlögnum á sjúkrahús fækkað hlutfallslega og enn færri hafi þurft að leggjast inn á gjörgæslu. „Það hafa ekki að mínu mati verið lögð fram sannfærandi gögn í dag um að þessar aðgerðir séu settar fram af brýnni nauðsyn,“ er haft eftir henni og sagðist hún hér eiga við aðgerðir innanlands og á landamærunum þar sem mismunandi reglur gildi fyrir óbólusetta og bólusetta.