Margir bandarískir stjórnmálamenn hafa áhyggjur af stöðu mannréttindamála í Egyptalandi en samt sem áður var heimilað að selja landinu 12 Hercules flutningavélar og annan útbúnað fyrir 2,2 milljarða dollara.
Bandarísk stjórnvöld segja að þessi sala muni styrkja getu Egypta til að takast á við núverandi ógnir og ógnir í framtíðinni með því að auka stuðning úr lofti við hersveitir landsins.
Í tengslum við þessi kaup fá Egyptar einnig tækifæri til að kaupa loftvarna- og ratsjárkerfi fyrir 355 milljónir dollara.
Mannréttindasamtök telja að nú séu um 60.000 pólitískir fangar í Egyptalandi en það virðist ekki hafa haft áhrif á ákvörðun bandaríska utanríkisráðuneytisins en í því sambandi má nefna að í september stöðvaði utanríkisráðuneytið afhendingu 130 milljóna dollara þróunaraðstoðar við landið vegna stöðu mannréttindamála. Í nóvember hvatti Antony Blinken, utanríkisráðherra, Egypta til að gera áþreifanlegar og viðvarandi umbætur á mannréttindum í landinu.
