Einar Hermannsson sagði af sér sem formaður SÁÁ í dag. Í yfirlýsingu til fjölmiðla sagði hann afsögnina mega rekja til þess að fyrir nokkrum árum hafi hann svarað auglýsingu þar sem kynlífsþjónusta var boðin til kaups og að þau samskipti hafi verið til þess fallin að varpa rýrð á starf SÁÁ. Ekki tók Einar fram í yfirlýsingu að umrædd samskipti hafi verið undanfari vændiskaupa en Stundin kveðst hafa gögn undir höndum sem sýni að Einar hafi keypt vændi af konu á tveggja ára tímabili. Umrædd kona var í virkri neyslu vímuefna á þeim tíma.

Nú hefur Stundin greint frá því að afsögn Einars, sem hann tilkynnti í dag, kom í kjölfar rannsóknarvinnu Stundarinnar vegna umfjöllunar um vændiskaup hans á árunum 2016-2018, en sú rannsókn sé studd gögnum sem sýni meðal annars samskipti Einars og konu í skilaboðum á Facebook. Hefur Stundin rætt við konuna sem er í bata af fíknisjúkdóm, en hún leiddist út í vændi til að fjármagna neyslu sína. Hún segir að á áðurnefndu tímabili hafi Einar keypt af henni kynlífsþjónustu og eftir að hún náði bata hafi hún ætlað að leita réttar síns, en síðan orðið hrædd og því ekki kært. Málið sé nú fyrnt. Konan er í dag skjólstæðingur SÁÁ.

Stundin segist enn fremur hafa heimildir fyrir því að Embætti landlæknis hafi verið tilkynnt um málið árið 2020 og að minnst einn stjórnarmaður í framkvæmdastjórn SÁÁ hafi árið 2020 vitað að því að Einar hafi keypt vændi af konu sem var fíkniefnaneytandi þegar hún var í virkri neyslu.

Mun Stundin fjalla nánar um málið á næstu dögum.