Haraldur Þorleifsson frumkvöðull, gjarnan kenndur við fyrirtækið Ueno, hefur nú öðru sinni komið með eftirtektarvert innlegg inn í metoo-umræðuna. Í sumar hét Haraldur því að greiða mögulegar skaðabætur sem harðorðir gagnrýnendur Ingólfs Þórarinssonar, Ingó Veðurguðs, kynnu að vera dæmdir til að greiða, í kjölfar þess að lögmaður Ingós sendi kröfubréf á nokkra einstaklinga.

Núna hefur skotið upp kollinum umræða um svokallaða þöggunarsamninga, þ.e. er þolendur kynferðisbrota skrifa undir samning um að greina ekki frá broti, gegn greiðslu.

Haraldur hefur nú stigið fram á Twitter með fyrirheit um að aðstoða þá sem vilja losna undan slíkum þöggunarsamningum. Haraldur ritar á Twitter:

„Hafðu samband (sendu DM) ef að þú ert með þöggunarsamning útaf kynferðisbroti og vilt vita hvernig þú losar þig úr honum. Ég get ekki lofað neinu en kannski getum við fundið lausn.“

Lögmaður Ómar R Valdimarsson er ekki hrifinn af þessu framtaki og skrifar eftirfarandi færslu um málið á Facebook, þar sem hann hvetur til að skaðabætur verði stórhækkaðar í svona málum:

„Ef auðmenn eru farnir að fjármagna málsvörn einstaklinga sem eru að níða skóinn af samborgurum sínum, þá má velta því fyrir sér hvort að dómstólar þurfi ekki að hækka bætur ansi hressilega, þannig að þeim svíði sem undir mígi?“

Hafðu samband (sendu DM) ef að þú ert með þöggunarsamning útaf kynferðisbroti og vilt vita hvernig þú losar þig úr honum.

Ég get ekki lofað neinu en kannski getum við fundið lausn.

— Halli (@iamharaldur) January 19, 2022