Jón Friðrik Þorgrímsson hefur verið ráðinn framkvæmdastjóri Hlöllabáta ehf en fyrirtækið rekur samnefnda keðju ásamt veitingastaðnum Barion í Mosfellsbæ. Tekur hann við stöðunni af Sigmari Vilhjálmssyni, sem oftast er kallaður Simmi Vill.

Fyrir viku síðan var greint frá því að samstarf viðskiptafélaganna Sigmar Vilhjálmsson, og Óli Valur Steindórsson væri að líða undir lok, en þeir hafa rekið saman veitingastaðina Hlöllabáta, Barion Mosó, Barion Brugghús og Minigarðinn.

Lesa meira: Gefa samstarfið upp á Hlölla-bátinn

Jón Friðrik er uppalinn á Húsavík en hann hefur búið og starfað bæði á Akureyri og Reykjavík síðustu ár. Hann er  menntaður matreiðslumeistari og hefur undanfarin ár starfað sem stjórnandi í veitingaiðnaði. Jón Friðrik var veitingastjóri hjá Kea hótelum frá árinu 2013 til ársins 2020 eða þar til hann var ráðinn til Hlöllabáta, þar sem hann hefur síðustu mánuði gegnt starfi framkvæmdastjóra rekstrarsviðs.

„Ég er mjög spenntur að taka við starfi framkvæmdastjóra hjá jafn öflugu fyrirtæki og samstæða Hlöllabáta er. Þetta eru krefjandi tímar og það hefur verið lærdómsríkt að standa í veitingarekstri. Það er mikill hugur og samstaða í hópnum og hefur starfsfólkið staðið sig gífurlega vel og ætlum við okkur að stefna áfram veginn og reyna að gera enn betur,“ segir Jón Friðrik.