Nýtt afbrigði af kórónuveirunni Sars-CoV-2 er komið fram á sjónarsviðið. Það fannst í 12 manns í suðurhluta Frakklands. Afbrigðið, sem vísindamenn hafa nefnt IHU eftir stofnuninni sem þeir starfa hjá en hún heitir IHU Méditerranée Infection og er í Marseille, er með fleiri stökkbreytingar en Ómíkronafbrigði veirunnar.

Þetta kemur fram í frumrannsókn 10 vísindamanna sem starfa við IHU. Rannsókn þeirra hefur ekki verið ritrýnd.

Afbrigðið hefur ekki fundist í öðrum löndum en það fannst á litlu svæði í Frakklandi sem hefur ákveðin tengsl við Kamerún. Afbrigðið er með fjölda stökkbreytinga og hefur losað sig við ákveðin erfðaefni. Það getur haft áhrif á hversu smitandi það er og hvernig bóluefni virka gegn því. Dagbladet skýrir frá þessu.

Afbrigðið, sem hefur fengið heitið B.1.640.2, er með 46 stökkbreytingar, þar á meðal hina svokölluðu N501Y-stökkbreytingu sem er einnig í Alfa, Beta, Ómíkron og Gammaafbrigðum veirunnar. Þessi stökkbreyting gerir afbrigðin enn meira smitandi. Afbrigðið er einnig með E484K-stökkbreytinguna, sem einnig er að finna í Gamma- og Betaafbrigðunum, sem gerir veirunni auðveldara fyrir að komast framhjá ónæmiskerfi fólks.

Allir hinir smituðu eru frá litlu svæði í Forcalquier sem er skammt norðan við Marseille. Vísindamennirnir telja að afbrigðið hafi borist frá Kamerún. Þaðan kom maður um miðjan nóvember og greindist með kórónuveiruna. PCR-sýni leiddi í ljós að veiran var með „óvenjulega samsetningu“ stökkbreytinga sem líktust ekki Deltaafbrigðinu sem var ráðandi á þessum tíma.

Rannsóknin hefur ekki verið ritrýnd og Alþjóðaheilbrigðismálstofnunin WHO hefur ekki sett afbrigðið í flokk afbrigða sem þarf að fylgjast með. Það hefur heldur ekki fengið grískt nafn. Vísindamennirnir, sem uppgötvuðu afbrigðið, segja að enn sé of snemmt að segja til um eiginlega afbrigðisins, til þess séu 12 tilfelli of fá.

Alþjóðlegir vísindamenn efast um að afbrigðið sé mikil ógn við lýðheilsu á heimsvísu. Stökkbreytt afbrigði verði sífellt til og aðeins nokkur þeirra fái mikla athygli og hafi áhrif á heilsu fólks.

Eric Feigl-Ding, bandarískur farsóttafræðingur sem var meðal þeirra fyrstu til að vara við því að Sars-CoV-2 gæti orðið að heimsfaraldri, skrifaði á Twitter að IHU sé dæmi um að við verðum að fylgjast betur með þróun veirunnar. Hann skrifaði einnig að IHU eigi erfitt verkefni fyrir höndum ef það á að slá Ómíkron- og Deltaafbrigðunum við.