Almannavarnir og lögreglustjórinn á Suðurnesjum hafa ákveðið að virkja sms-skilaboð sem verða send til fólks sem fer inn á fyrirfram skilgreint svæði vegna jarðskjálftanna sem hafnir eru á ný við Fagradalsfjall á Reykjanesi. Þetta kemur fram í færslu sem birt var á Facebook-síðu Almannavarnadeildar ríkislögreglustjóra.

„Er þetta gert því eldgos gæti hafist með litlum fyrirvara. Komi til eldgoss verður textaskilaboðum breytt í beina aðvörun til þeirra sem eru á umræddu svæði,“ segir í færslunni.

Þá kemur fram að ekki sé hægt að útiloka að sms-skilaboðin berist til fólks aðeins utan við skilgreint svæði og er því almenningur beðinn um að hafa það í huga.

Lögreglustjórinn á Suðurnesjum varar að lokum fólk við að fara í göngu um gosstöðvarnar á meðan þessi óvissa ríkir.