Þessi tilvitnun birtist í Morgunblaðinu í morgun en það er fjölmiðlafræðingurinn og „skoðanakrimminn“ Íris Erlingsdóttir sem skrifar þessi orð. Um er að ræða tilvitnun í pistil sem Íris skrifaði og var birtur á prenti í Morgunblaði dagsins í dag eins og hver annar skoðanapistill.
Pistillinn fjallar um réttindi trans fólks en óhætt er að segja að líta megi á pistilinn sem áróður gegn trans fólki. Íris, sem búsett er í Bandaríkjunum, nýtir kunnuglega strámenn í pistlinum eins og að karlmenn nýti sér réttindi trans fólks til að koma sér inn á svæði kvenna.
„Aðallega eru það karlar sem hafa nýtt sér réttinn til að tékka sig inn í kvenkyn með samsvarandi réttindamissi fyrir konur. Hér í Bandaríkjunum hafa transaðgerðasinnar vaðið yfir kynbundin réttindi kvenna og reisn; inn í salerni kvenna og búningsklefa; í kvennaíþróttir, sem hafa verið yfirteknar af körlum í konuleik; inn í kvennafangelsi, þar sem konur verða að deila vistarverum með körlum, sama hvort þeir eru blíðlyndir skattsvikarar og þjófar eða nauðgarar og morðingjar.“
Ástæðan fyrir skrifum Írisar er sú að dóttir hennar segist ekki geta notað klósettin í skólanum sínum sökum þess að strákar geta komið inn á þau. „Það er ekkert prívat, svo ég verð að halda í mér þangað til ég kem heim,“ segir hún dóttur sína hafa sagt eftir að heimillislæknirinn tjáði henni að hún væri með vott af blöðrubólgu vegna þess að hún fer ekki á klósettið þegar henni er mál.
Pistillinn ber yfirskriftina „Dóttir mín legberinn“ og fjallar að hluta til um þetta nýyrði sem notað hefur verið um þá einstaklinga sem eru með leg. Íris virðist ekki vera sátt við nýyrðið og hraunar duglega yfir það í pistlinum, eins og það sé valdurinn að blöðrubólgu dóttur sinnar.
„Eiga þessir nýyrðasmiðir systkini? Börn? Ég á þrjú. Eitt er semsagt „legberi“, hin tvö eru … pungberar? Mhm, já í guðs bænum, losið okkur við eineltisvaldinn og orðskrípið „kona“ úr … legberamálinu? Við skulum endilega banna orðin sem við notum til að tjá okkur um raunveruleikann – enda höfum við greinilega enga þörf fyrir hann lengur – og nota í staðinn hégiljur og falskt froðusnakk, fullkomið til að lýsa lyginni sem við lifum,“ segir hún í pistlinum.
Undir lokin virðist Íris halda að allt sé öfugsnúið. „Kyngervishugmyndafræði er nákvæmlega … gervi. Lygi. Karlar eru konur. Stelpur eru strákar. Upp er niður. Svart er hvítt. Heitt er kalt,“ segir hún.
Íris botnar svo pistilinn með orðunum sem þessi frétt hófst á. „Við vitum að mannverur geta ekki skipt um kyn frekar en þær geta skipt um kynþátt. Að halda öðru fram – að láta börn og unglinga synda í „öllu þessu botnlausa lygakviksyndi [sem] er verið að hrósa“, eins og Þórbergur sagði, er beinlínis misnotkun.“
