Ráðuneytið gaf nýlega út nýjar reglur um þetta og kom sér hjá því að banna liðsmönnum hersins að ganga í öfgasamtök. Ráðuneytið vill ekki segja hvort það teljist brot á reglum hersins ef hermenn neita að viðurkenna að Joe Biden sé leiðtogi landsins.
Herinn hefur verið undir miklum þrýstingi á síðustu árum um að gera umbætur í sínum röðum. Þessi þrýstingur jókst mikið eftir að nokkrir hermenn tóku þátt í árásinni á bandaríska þinghúsið þann 6. janúar síðastliðinn en það voru stuðningsmenn Donald Trump, þáverandi forseta, sem stóðu að baki árásinni.
Frá því að stjórn Biden tók við völdum hefur hún unnið að því að skilgreina hvaða starfsemi öfgasamtaka eigi að banna hermönnum að taka þátt í.
Samkvæmt nýju reglunum mega hermenn ekki „læka“ öfgaefni á samfélagsmiðlum. Þeir mega heldur ekki standa fyrir fjáröflun fyrir öfgasamtök né taka þátt í mótmælum á þeirra vegum eða til stuðnings þeim. Ekki liggur fyrir hvort og þá hver refsingin er fyrir að brjóta þessar reglur.
Ráðuneytið vill þó ekki banna hermönnum að gerast félagar í öfgasamtökum á borð við Ku Klux Klan og Proud Boys. „Ef við ætluðum að gera lista yfir öfgasamtök þá væri bara hægt að nota hann daginn sem hann væri birtur af því að þessi samtök breytast sífellt,“ sagði talsmaður ráðuneytisins á fréttamannafundi.
