„Þessar samkomutakmarkanir hafa náttúrulega sett þessa vertíð í uppnám hjá okkur. Við seljum aðallega til veitingastaða, fyrirtækja og mötuneyta og því hefur verið talsvert um afpantanir. Við eigum því nóg til af kæstri skötu,“ segir Áslaug Ragnarsdóttir, eigandi Djúpsins fiskvinnslu úti á Granda.

Um er að ræða lítið fjölskyldufyrirtæki sem stofnað var árið 2019. Umsvifin hafa vaxið hratt og ýmis ævintýri bankað upp á. Á heimasíðu fyrirtækisins segir að þau séu leyst með kímnigáfu og gleði að vopni sem er auðheyrt í samtali við Áslaugu sem er eldhress þrátt fyrir krefjandi vendingar á skötumarkaði.

Djúpið sérhæfir sig aðallega í ferskum fisk en gerir undantekningu varðandi hina rammíslensku og sterklyktandi jólahefð. „Þorláksmessuskatan er í raun hálfgert áhugamál hjá okkur. Við byrjum snemma á árinu og erum að sanka að okkur hráefni allt árið. Þetta hefur gengið vel og meðal annars erum við að þjónustu Múlakaffi, Í mat og Brasserie Kársnes – þannig að við erum að gera eitthvað rétt,“ segir Áslaug.

Það hefur verið ljóst um tíma að vertíðin yrði með erfiðara móti en þegar að hertar samkomutakmarkanir voru kynntar í dag þá var ljóst að hafa þurfti hraðar hendur við að koma góðgætinu út. „Ég verð að losna við alla ammoníakslyktina úr húsinu,“ segir Áslaug og hlær.

Fyrirtækið hefur því ákveðið að gefa 10 manna skötuveislu í samstarfi við DV. „Við skutlum þessu bara upp að dyrum og hnoðmör og hamsatólg með,“ segir Áslaug hress.

Til þess að taka þátt þarf að fara inn á Facebook-síðu DV og skrifa með hverjum þú vilt njóta matarins með í athugasemd við færsluna sem sjá má hér fyrir neðan.