Það er stundum haft á orði að heilaskurðlæknar, flugvélaverkfræðingar og sumar aðrar stéttir samanstandi af svo greindu fólki að við hin, sem teljumst svona nokkuð eðlileg, stöndum þeim langt að baki hvað varðar gáfnafar. En nú sýna niðurstöður nýrrar rannsóknar að svo er ekki.

Rannsóknin byggist á gögnum um 329 flugvélaverkfræðinga og 72 taugaskurðlækna. Niðurstöður hennar eru að þetta fólk sé ekki neitt endilega gáfaðra en við hin.

Vísindamenn fóru yfir gögn fólksins eftir að það lauk 12 verkefnum sem voru lögð fyrir það á netinu. Verkefnin voru byggð á the Great British Intelligence Test. Að auki svöruðu þátttakendurnir spurningum um aldur sinn, kyn og starfsreynslu og sérhæfingu. The Guardian skýrir frá þessu.

Verkefnin náðu yfir ýmsa gáfnaþætti, þar á meðal skipulagningu og rökfærslu, minni, athygli og getu til að vinna úr tilfinningum. Niðurstöðurnar voru síðan bornar saman við niðurstöður sem hafði verið aflað hjá 18.000 Bretum, þverskurði samfélagsins.

Niðurstöðurnar hafa verið birtar í the British Medical Journal. Samkvæmt þeim þá voru það aðeins taugaskurðlæknarnir sem stóðu upp úr því þeir voru fljótari en aðrir að leysa vandamál en áttu erfiðara með að muna hluti en aðrir. Vísindamennirnir segja að sá hæfileiki taugaskurðlæknanna að geta leyst vandamál hraðar en aðrir sé hugsanlega tengdur starfi þeirra þar sem þeir þurfi oft að bregðast hratt við. Það geti þýtt að fólk, sem er fljótt að bregðast við, leiti frekar í starfið eða þá að þjálfun þess og reynsla skipti þarna sköpum.