Aldrei hafa fleiri stelpur á aldrinum 12 til 17 ára fengið uppákskrifuð þunglyndis- eða kvíðalyf en á þessu ári, ein af hverjum tíu stelpum á þessum aldri eru á slíkum lyfjum hér á landi. Þetta kom fram í máli Björns Hjálmarssonar, geðlæknis á barna- og unglingageðdeild Landspítalans, BUGL, í Morgunútvarpinu á Rás 2 í morgun.
Í viðtalinu kom Björn með nokkrar ástæður fyrir þessari auknu lyfjanotkun en hann segir að hluta til megi rekja hana til byltinga. Fyrsta byltingin sem hann nefnir er þegar sambúð þriggja kynslóða undir sama þaki fór að heyra sögunni til. Afar og ömmur hlaupi ekki lengur undir bagga eins og áður þegar aðstoð vantar við uppeldið.
Hin byltingin sem Björn nefnir er kvenfrelsisbarátta kvenna. Hann segir að með henni hafi börnin misst mömmurnar út af heimilunum en að feðurnir hafi ekki komið inn í staðinn. „Ég held að þetta sé svolítið að trufla börnin okkar,“ segir hann.
Björn rekur þessa auknu lyfjanotkun einnig til aukins trúleysis, hann segir að trúað fólk geti sótt mátt í trúna. „Sorgin er að verða meira og meira sjúkdómsvædd. Þeir sem eru sanntrúaðir, þeir geta sótt svo mikinn mátt í trúna. Trúarheimspeki, það að geta sótt styrk í æðri mátt, trúin á hið góða, hið fagra og hið fullkomna er mjög góður styrkur,“ segir hann í viðtalinu.
Björn segir að hann sé ekki endilega að tala fyrir kristni heldur einfaldlega fegurðinni sem hann sér í trúarbrögðunum. Hann segist sjá það hjá sínum skjólstæðingum á barna- og unglingageðdeildinni að það sé algengt að stelpur komi þangað í djúpri vanlíðan og fái í kjölfarið lyf vegna þess.
„Það er eins og allar sorgir þeirra í lífinu séu enn óunnar,“ segir hann og bætir við að hraðinn og spennan í þjóðfélaginu geri það að verkum að einstaklingar vinni ekki úr sorgum sínum og í kjölfarið líði þeim svo illa að þeir óska eftir lyfjum til að losna við sorgina.
