Willum Þór Þórsson heilbrigðisráðherra tilkynnti nú rétt í þessu óbreyttar frelsisskerðingar og takmarkanir í tvær vikur, en útilokaði þó ekki að hægt yrði að slaka á fyrr. Sagði hann að beðið væri eftir nánari upplýsingum og gögnum um hvernig nýtt afbrigði veirunnar, hið svokallaða Ómíkron afbrigði, hagar sér.

Willum útilokaði ekki og sagðist raunar binda vonir við að hægt yrði að aflétta hraðar en það. Aðspurður um hvort samstaða hafi verið um aðgerðirnar inni á ríkisstjórnarfundi sagði Willum að vangaveltur hafi verið uppi um að fjölga úr 50 í 100, og að lengja opnunartíma veitingastaða um klukkustund. „En við þurfum gögnin og það er aldrei gott að taka ákvarðanir af því bara,“ sagði Willum Þór.

Willum sagði að þetta væri auðvelt í upphafi, þegar fullkomin óvissa var uppi. „Þá var mjög auðvelt að grípa í kaðalinn og fylgja einum manni sem sagði þangað förum við. Síðan lærum við að beita vísindum og rannsóknum til að taka ákvarðanir og þær eiga auðvitað að vera i átt að því að leyfa samfélaginu að ganga með hefðbundnum hætti eins og við þekkjum það,“ sagði heilbrigðisráðherrann.

Í Fréttablaðinu í morgun sagði að Sjúkratryggingar Íslands hefðu greitt 240 milljónir á tíu vikna tímabili fyrir framkvæmd hraðprófa. Aðspurður hvort einkaaðilar væru að maka krókinn á Covid faraldrinum sagði Willum ekki trúa því að svo væri, en að hann ætti eftir að skoða gögnin í málinu. „Þetta er auðvitað spurning um að nýta hraðgreiningarprófin og við getum ekki lagt það allt á heilsugæsluna og því þurfum við að nýta einkaaðila í því til þess að halda viðburðum sem krefjast þeirra gangandi í samfélaginu,“ útskýrði Willum.