Lögreglan lýsti fyrr í kvöld eftir Heimi Erni Johnson en hann fannst tæpum hálftíma eftir að tilkynningin frá lögreglunni barst. Ljóst er að leitin að Heimi var afar umfangsmikil en þyrla Landhelgisgæslunnar var fengin til að hjálpa til við leitina að honum. Þá voru fjölmargir björgunarsveitarmenn einnig kallaðir út til að aðstoða við leitina.
DV ræddi við Davíð Má Bjarnason, upplýsingafulltrúa Landsbjargar, um leitina en Davíð segir að um 150 björgunarsveitarmenn hafi tekið þátt í leitinni. „Það er búið að kalla út nokkurn fjölda af björgunarsveitarmönnum í Reykjavík til að aðstoða lögreglu við leitina.
Hann staðfesti að leitin tengdist manninum sem lögreglan lýsti eftir fyrr í kvöld. „Það var verið að leita í Reykjavík, það tengist í raun og veru tilkynningu sem lögreglan sendi á fjölmiðla núna fyrir stuttu.“
Í tilkynningunni sem barst frá lögreglu um Heimi kom fram að hann hafi síðast sést í Kuggavogi í Reykjavík. Íbúi í nágrenninu tók upp myndband þar sem sjá má hve umfangsmikil leitin var. Til að mynda má sjá björgunarsveitarmenn ganga um hverfið í leit að manninum en einnig má sjá þyrlu Landhelgisgæslunnar notast við ljóskastara.
Myndbandið má sjá í spilaranum hér fyrir neðan:
