Sjúkraliði hjá Reykjavíkurborg íhugar að segja upp störfum því nagladekkin voru tekin af

Sjúkraliði hjá Reykjavíkurborg, íhugar að segja upp störfum eftir að bílar heimahjúkrunar á vegum borgarinnar voru teknir af nagladekkjum. Þetta kemur fram í frétt Morgunblaðsins í morgun.

Reykjavíkurborg hefur lagt áherslu á að óþarfi sé að nota nagladekk innan borgarmarkanna. Að mati borgarinnar auka nagladekk kostnað á viðhaldi gatna í Reykjavík með því að slíta malbikið margfalt hraðar en önnur dekk, þau auka eldsneytiskostnað bifreiða, þau valda óþarfa hávaða og draga úr loftgæðum með mengun.

Þrátt fyrir þessa yfirlýstu stefnu borgarinnar greindi Fréttablaðið frá því í lok nóvember að fjórðungur af 97 bílum velferðarsviðs Reykjavíkurborgar væru á nagladekkjum. Viðbrögð borgarinnar við fyrirspurn blaðsins var tilkynna um að bílarnir myndu fá aðra tegund dekkja á næstunni. Það hefur nú verið gert og Björg Loftsdóttir, sjúkraliði hjá Reykjavíkurborg, er ekki sátt við það.

Björg sinnir heimahjúkrun meðal annars í efri byggðum borgarinnar og segist hún í samtali við Morgunblaðið upplifa óöryggi í starfi eftir að ákveðið var að bílarnir skyldu ekki vera á nöglum.

„Það er allt annað veðurfar í efri byggðum. Ég myndi ekki fara út í óveðri á mínum bíl. En ég þarf að fara út í hvaða veðri sem er til að sinna vinnu minni. Ég er að fara til fólks sem er veikt. Ég þarf að koma því í rúmið, gefa því lyf,“ segir Björg við Morgunblaðið og bætir við að starfsmenn heimahjúkrunar séu oft snemma á ferðinni, jafnvel áður en búið er að ryðja snjó í öllum hverfum.

Þá bendir Björg á að starfsmenn séu ekki á neinum jeppum heldur smábílum á boð við Nissan Micra, Toyota Yaris og Kia Rio. Björg segist hafa mætt litlum skilningi hjá borginni vegna málsins og íhugar að segja upp störfum vegna þess.