Óheppilegt atvik átti sér stað í bænum Buffalo í Minnesota í Bandaríkjunum á dögunum þegar bifreið var ekið inn í hús. Þetta væri svo sem ekki í frásögur færandi nema fyrir þær sakir að undir stýri sat sautján ára stúlka sem var að taka bílpróf.

Stúlkan sem um ræðir ætlaði að bakka bifreiðinni úr bílastæðinu fyrir utan húsnæði ökuskólans í bænum. Í stað þess að setja bílinn í bakkgír ók hún áfram með fyrrgreindum afleiðingum. Talsverðar skemmdir urðu á húsinu eins og meðfylgjandi mynd ber með sér.

Stúlkan unga slasaðist ekki en leiðbeinandi hennar, sextug kona, þurfti að leita sér aðhlynningar á sjúkrahúsi vegna minniháttar meiðsla. Ljóst er að einhver töf verður á því að stúlkan fái bílprófið.