Þetta er meðal þess sem kemur fram í ákæru á hendur 25 ára karlmanni, sem hefur setið í gæsluvarðhaldi síðan í maí, en hann er ákærður fyrir að hafa farið inn á Egmont H. Petersens heimavistina í Kaupmannahöfn aðfaranótt 22. maí síðastliðinn og framið kynferðisbrot. Í heildina er hann ákærður fyrir 19 brot. Hann neitar sök.
Hann er ákærður fyrir að hafa á þremur klukkustundum gengið á milli herbergja til að reyna að fullnægja kynferðislegri þörf sinni. Á leið sinni í gegnum þrjár byggingar heimavistarinnar telur lögreglan að hann hafi nauðgað tveimur konum og að önnur þeirra hafi orðið fyrir „grófri nauðgun“.
Hann er einnig ákærður fyrir að hafa brotið gegn fimm öðrum til að reyna að fá útrás fyrir kynferðislegar þarfir sína og að hafa brotið gegn „heimilisfriði“ fimm til viðbótar. Ekstra Bladet skýrir frá þessu.
Lögreglan handtók manninn nokkrum klukkustundum síðar en hann bjó ekki á heimavistinni. Hann hefur setið í gæsluvarðhaldi síðan. Lögreglan segir að hann hafi brotið gegn tíu konum og tveimur körlum.
Kona, sem kærði hann fyrir nauðgun, segir að hún hafi verið sofandi þegar maðurinn afklæddi hana. Hann hafi haldið áfram þrátt fyrir að hún hafi beðið hann um að hætta. Hann hafi notað líkamsþunga sinn til að halda henni niðri á meðan hann kom fram vilja sínum. Hinni konunni tókst að ýta manninum af sér.
Hann braust inn hjá konu, sem var nakin, en hún öskraði tvisvar þegar hann neitaði að yfirgefa herbergi hennar. Hjá annarri konu, sem hann braust inn til, kom það honum á óvart að hún var ekki ein, unnusti hennar var hjá henni og tókst þeim að koma manninum út.
Ekki liggur fyrir hvernig maðurinn komst inn því útidyr heimavistarinnar eru alltaf læstar og það eru verðir við þær sem vísa fólki á brott ef það hefur ekki mælt sér mót við íbúa.
