Michael Rowan-Robinson, stjörnufræðingur hjá Imperial College London, fór yfir gögn frá gervihnettinum IRAS frá 1983 og fann þar þrjú atriði sem gætu verið frá níundu plánetunni og geta hugsanlega komið að gagni við að staðfesta hvort hún er til eður ei og þá hvar hún er. Science Alert skýrir frá þessu.
Rowan-Robinson setur þó fyrirvara við uppgötvun sína og skrifar í rannsókninni að ekki sé sannað að þessi þrjú atriði séu í raun staðfesting á tilvist plánetunnar.
Gögnin eru ekki í góðum gæðum og Rowan-Robinson segir að ef þau séu frá plánetunni sé aðallega hægt að nota þau til að staðfesta tilvist hennar og síðan til að staðsetja hana.
Samkvæmt kenningum þá er níunda plánetan 400 til 800 stjarnfræðieiningar frá sólinni. Ein stjarnfræðieining er meðal vegalengdin á milli sólarinnar og jarðarinnar. Til að setja þetta í samhengi má nefna að Plútó er í um 40 stjarnfræðieiningar frá sólinni.
Plánetan, ef hún er til, er því gríðarlega langt frá sólinni og þar af leiðandi mjög köld og endurkastar ekki miklu sólarljósi sem gerir að verkum að erfitt verður að finna hana.
Fræðilega séð er IRAS í standi til að taka eftir ferðum níundu plánetunnar og skrá þær. Af þeim sökum ákvað Rowan-Robinson að fara yfir gögn frá gervihnettinum og bera saman við atriði sem geta passað við níundu plánetuna. Í júní, júlí og september 1983 fann hann gögn sem sýna stóran hlut á ferð um himingeiminn, þetta gæti verið níunda plánetan. Ef svo er þá er massi hennar 3-5 sinnum meiri en massi jarðarinnar og hún er ekki 400 til 800 stjarnfræðieiningar frá sólinni heldur 225 einingar. Þessi gögn geta einnig veitt upplýsingar um sporbraut plánetunnar um jörðina og hvar hún er í dag.
Óhætt er að segja að ef þessi gögn reynast eiga við níundu plánetuna þá eru það stór tíðindi.
