Ekkert hefur spurst til þeirra síðan 20. mars 2020 en þá voru þau í tjaldútilegu í Wonnagatta Valley í Alpine þjóðgarðinum í Ástralíu. Hann er um 200 kílómetra norðaustan við Melbourne.
Það eru þó ákveðnar vísbendingar í málinu en þær eru í óhugnanlegri kantinum. Tjaldið þeirra fannst brunnið á tjaldstæðinu þar sem þau höfðu komið sér fyrir. Bíll Russell bar þess einnig merki að hafa verið í návígi við logana.
Nýlega handtók lögreglan 55 ára flugmann sem er grunaður um að vera valdur að hvarfi Russell og Carol. Ættingjar þeirra vona að nú komist lögreglan eitthvað áleiðis við rannsókn málsins en þeir hafa lifað í óvissu mánuðum saman um örlög ástvina sinna. ABC News skýrir frá þessu.
Í viðtölum fjölmiðla við ættingja þeirra hefur komið fram að þeir vissu ekki um ástarsambandinu sem stóð líklegast yfir áratugum saman.
„Þetta er mjög erfitt. Það verður ekki auðveldara þegar maður veit ekkert með vissu. Allt er svo óvíst, hann hvarf bara,“ sagði Debbie, dóttir Russell, við BBC. Eiginkona hans, Robyn, sagðist vonast til að handtakan verði til þess að málið skýrist. Hún hafði ekki hugmynd um ástarævintýri eiginmannsins og hvað þá að hann hefði farið í tjaldferðalag með Carol.
Hinn handtekni var handtekinn á mánudaginn. Hann þekkir svæðið, þar sem Russell og Carol tjölduðu, mjög vel og bíll hans hefur ákveðin tengsl við málið. Manninum hefur nú verið vikið frá störfum hjá flugfélaginu Jetstar, að minnsta kosti tímabundið.
ABC News segir að lögreglan vilji ekki tjá sig frekar um málið að sinni annað en að rannsókn standi yfir.
