Utanríkisráðuneytið hefur tekið upp á þeirri nýjung að birta upplýsingar um sóttvarnartakmarkanir í þeim löndum þar sem ráðuneytið heldur úti sendiráðum.
Bætti ráðuneytið flokknum „sóttvarnir á landamærum,“ og „reglur innanlands“ við listann. Áður birti ráðuneytið aðeins ferðatakmarkanir sem í gildi eru í löndunum.
Samkvæmt upplýsingum DV hefur utanríkisráðuneytið frá upphafi Covid faraldursins tekið saman upplýsingar sem aflað er af útsendum erindrekum þeirra í sendiráðum víða um heim. Þessum upplýsingum er svo skeytt saman í skýrslu sem lögð hefur verið fyrir ríkisstjórnarfundi.
DV óskaði eftir umræddum upplýsingum en fékk ekki, enda er stjórnvöldum ekki skylt að afhenda gögn eða upplýsingar sem tekin eru saman sérstaklega fyrir ríkisstjórnarfundi.
Nú hefur ráðuneytið, eins og fyrr sagði, átt frumkvæði að því sjálft að birta umræddar upplýsingar, og eru þar að finna gögn sem geta átt erindi við Íslendinga sem hyggja á ferðalög nú aðgengileg inni á vefsíðu ráðuneytisins, undir „Ferðaráð vegna Covid-19 heimsfaraldurs.“
