Úkraínumaðurinn Yaroslav Vasinskyi, 22 ára, var nýlega handtekinn í Póllandi. Hann er tengdur hinum illræmda Revil-hópi sem er hópur tölvuþrjóta. Áður en hann var handtekinn höfðu yfirvöld lagt hald á 6,1 milljónir dollara í rafmynt en það svarar til rúmlega 800 milljóna íslenskra króna.

Þetta kemur fram í fréttatilkynningu frá bandaríska utanríkisráðuneytinu. Bandarískir embættismenn hafa nú þegar farið fram á að Vasinskyi verði framseldur til Bandaríkjanna.

REvil kom fyrst fram á sjónarsviðið 2019 en hópurinn hefur staðið á bak við fjölda tölvuárása á þekkt bandarísk fyrirtæki.

Hópurinn er einnig sagður hafa staðið á bak við árás á Kaseya tölvufyrirtækið á síðasta ári en fyrirtækið starfar á heimsvísu.

Yevgeniy Polyanin, 28 ára Rússi, er eftirlýstur en hann er talinn samstarfsmaður Vasinskyi.