Árið 2013 greindist ung argentínsk kona með HIV sem er ólæknandi sjúkdómur sem er undanfari AIDS. En á einhvern ótrúlegan hátt þá er konan nú laus við veiruna og það án þess að hafa fengið nokkra læknismeðferð. Læknar telja að ónæmiskerfi hennar hafi af sjálfsdáðum ráðið niðurlögum veirunnar.

NBC News skýrir frá þessu. Fram kemur að konan, sem er nú þrítug, hafi greinst með HIV 2013 en þegar hún fór í rannsókn nýlega fundust engin merki um veiruna í líkama hennar. Rannsóknin var mjög ítarleg því læknar skönnuðu milljónir af frumum úr henni með fullkomnustu tækni.

Skýrt var frá þessu í vísindaritinu Annals of Internal Medicine á mánudaginn. Vísindamennirnir, sem stóðu að rannsókninni, vonast til að þetta geti orðið upphafið að frekari framförum á þessu sviði en talið er að 38 milljónir manna séu með HIV. „Nú verðum við að finna hvað liggur að baki þessu,“ sagði Steven Deeks, læknir sem starfar við rannsóknir á HIV hjá Kaliforníuháskóla, en hann kom ekki að rannsókninni.

Þetta er í annað sinn í sögunni, svo vitað er, sem HIV hefur horfið úr líkama sjúklings. Fyrra tilfellið var þegar veiran hvarf úr líkama bandarískrar konu, sem býr í Kaliforníu, en hún greindist með veiruna 1992. Hún er nú 67 ára og hefur verið laus við veiruna árum saman. Talið er að ónæmiskerfi hennar hafi gert út af við hana.

NBC News segir að vísindamönnum hafi áður tekist að lækna tvo HIV-sjúklinga af veirunni með því að beita flókinni og hættulegri stofnfrumuskiptaaðgerð.