Orios og Lindsey Zavros, áströlsk hjón, sitja nú föst í óbyggðum í sunnanverðri Ástralíu eftir að mikið óveður gekk yfir landshlutann um síðustu helgi. Með þeim eru tvö ung börn þeirra. Þau eru á stórum trukk með gistiaðstöðu. Hann festist í drullu eftir miklar rigningar sem fylgdu óveðrinu. Ekkert amar að fjölskyldunni og búið er að varpa vistum og gervihnattasíma til þeirra úr lofti. Þau gætu hins vegar þurft að bíða í allt að hálfan mánuð eftir björgun.

Sky News skýrir frá þessu. Haft er eftir áströlskum yfirvöldum að vegir á svæðinu, Simpson eyðimörkinni, séu á floti og verði væntanlega ófærir dögum saman.

Móðir Orio, Theo, sagði að erfiðar fimm klukkustundir hafi tekið við eftir að fjölskyldan sendi frá sér neyðarkall og þar til í ljós kom að ekkert amaði að þeim.

En nú hafa þau gervihnattarsíma og mat og drykk og ekkert amar að þeim.

Fjölskyldan, sem er frá Perth, hefur verið á ferðalagi um Ástralíu síðan í nóvember á síðasta ári og hafa sagt ferðasöguna á Instagram.

En núna sitja þau föst í Witjira þjóðgarðinum og geta þurft að dúsa þar næstu tvær vikurnar.

Lögreglan hefur nú tekið við málinu og mun sjá um að koma fjölskyldunni til bjargar þegar aðstæður leyfa.