Það styttist óðum í aðventuna og þá er gaman að eiga eitthvað gómsæt og jólalegt með aðventukaffinu. Hér er komin gómsæt og jólaleg útfærsla að kransaköku úr smiðju Berglindar Hreiðar köku- og matarbloggar hjá Gotterí og gersemar. Berglind hefur mikið dálæti að kranskakökum svo hún fór á stúfana og bjó til þessa dásemd. Nú er bara að prófa og slá í gegn í aðventunni.
Kransastjarna
Uppskrift dugar í tvær stjörnur
Stjarna
700 g Odense Marcipan
150 g sykur
½ – ¾ eggjahvíta (um 20 g)
- Setjið allt saman í hrærivélina og hnoðið með K-inu þar til blandan fer að þéttast.
- Takið úr vélinni og hnoðið í höndunum þar til vel samlagað og þétt kúla hefur myndast.
- Plastið kúluna vel og kælið í að minnsta kosti 2 klukkustundir eða yfir nótt.
- Teiknið þrjá misstóra þríhyrninga á bökunarpappír (18, 15 og 12 cm með jöfnum hliðum). Hægt er að teikna 1 þríhyrning af hverri stærð á eina bökunarplötu svo gerið tvær slíkar fyrir sitthvora stjörnuna.
- Rúllið út jafnar lengjur, um 1,5 cm í þvermál, skerið niður 6 lengjur af hverri stærð og raðið á þríhyrningana á hvorri plötu. Snyrtið aðeins af endunum til þess að þeir tengist betur saman og sléttið úr samskeytunum eins og unnt er með fingrunum.
- Bakið við 200° í 10-12 mínútur eða þar til stjörnurnar fara að dökkna.
- Kælið vel og sprautið síðan glassúr og súkkulaði á þær með mjóum hringlaga stút.
- Raðið stjörnunum síðan saman svo efsta og neðsta snúi eins og sú í miðjunni öfugt við hinar svo úr verði fallegt stjörnumynstur.
- Skreytið með blómum eða öðru sem hugurinn girnist.
Skreyting
- 1 eggjahvíta
- 200 g flórsykur
- 100 g brætt dökkt súkkulaði
- Setjið eggjahvítu og flórsykur í hrærivélina og þeytið vel saman.
- Notið örmjóan hringlaga stút eða klippið lítið gat á sterkan poka og sprautið glassúr á allar stjörnurnar.
- Bræðið næst súkkulaðið og endurtakið leikinn með því, leyfið súkkulaði og glassúr næst að storkna vel áður en þið raðið saman stjörnunum og skreytið.
Berið fallega fram og njótið.
