Skýrsla starfshóps um framtíðarskipan grunnskóla- og frístundastarfs í Austurbæjarskóla, Háteigsskóla, Hlíðaskóla og Vörðuskóla var lögð fram á síðasta fundi borgarráðs Reykjavíkur.
Reykjavíkurborg samþykkti á fundi borgarráðs 29. október 2020 að festa kaup á Vörðuskóla á Skólavörðuholti og fól skóla- og frístundasviði (SFS) að gera tillögu að safnskóla á unglingastigi í samráði við samliggjandi skólahverfi.
Með hliðsjón af spám um þróun nemendafjölda til skemmri og lengri tíma og framtíðarsýn fyrir skóla- og frístundastarf í anda nýrrar menntastefnu ,,Látum draumana rætast”, var samþykkt að setja af stað starfshóp til að rýna nemendaþróun í þremur skólahverfum.
Hópnum, sem skipaður var í febrúar 2021, var ætlað að meta og útfæra tillögur um framkvæmd grunnskóla- og frístundastarfs í Austurbæjarskóla, Háteigsskóla, Hlíðaskóla og Vörðuskóla í ljósi aukningar nemendafjölda sem orðið hefur á einstökum starfsstöðvum á undanförnum árum.
Starfshópurinn framkvæmdi SVÓT-greiningu á alls fimm sviðsmyndum sem lagðar voru til í vinnu hópsins:
Þessar fimm sviðsmyndir eru því tillögur starfshópsins til áframhaldandi vinnslu. Í rýni á skrifstofu SFS var talin ástæða til að bæta við þeirri sviðsmynd að Austurbæjarskólahúsið verði safnskóli fyrir unglinga en yngri stig í núverandi skólahverfi Austurbæjarskóla verði í Vörðuskóla. Verður þessum sex sviðsmyndum vísað annars vegar til skóla- og frístundasviðs til að leiða frekara umsagnarferli í skólasamfélaginu og hins vegar til umhverfis- og skipulagssviðs til að áhættumeta og kostnaðargreina tillögurnar. Í kjölfar þeirrar vinnu tekur skóla- og frístundasvið afstöðu til þess hvaða sviðsmynd styður best við skólastarfið.
Á fundi borgarráðs lagði áheyrnarfulltrúi Flokks fólksins fram svohljóðandi bókun:
Skýrsla starfshóps um Vörðuskóla og nærliggjandi skólahverfi er lögð fram í borgarráði. Kynntar eru fimm sviðsmyndir um framtíðarskipan grunnskóla- og frístundastarfs í Austurbæjarskóla, Háteigsskóla, Hlíðaskóla og Vörðuskóla. Framkvæmd var SVÓT greining á alls fimm sviðsmyndum. Fulltrúi Flokks fólksins vill nefna nokkur atriði sem hlýtur að vera mikilvægt að hafa í huga þegar verið er að vinna sviðsmyndir. Hafa þarf þarfir barnanna í huga á öllum stigum. Ávallt skal hafa hagsmuni þeirra að leiðarljósi þegar verið er að taka ákvarðanir um þau, aðstæður þeirra og umhverfi. Fulltrúa Flokks fólksins finnst mikilvægt að varðveita skólagerðir hverfisins og gæta þess að viðhalda hverfismenningu og aðstöðu barnanna. Horfa þarf á íþróttamálin og íþróttaaðstöðu samhliða öllum þessum hugmyndum. Bygging unglingaskóla/safnskóla fylgja áskoranir. Kostir og gallar eru við safnskóla. Með safnskólum breytast skólahverfin oft með tilliti til umferðar nemenda til og frá skóla. Slíkar breytingar þarf að leggja undir umferðarstofu Reykjavíkurborgar til að fá álit þeirra. Skoða þarf einnig hvað sparast með breytingum? Fara þarf yfir starfsmannamál. Hafa þarf þétt samstarf við foreldra, hverfaráð og aðra sem málið varðar.
Starfshópurinn var svo skipaður:
Soffía Pálsdóttir, skrifstofustjóri frístundamála SFS
Soffía Vagnsdóttir, skrifstofustjóri grunnskólamála SFS
Hafdís Guðrún Hilmarsdóttir, verkefnisstjóri á grunnskólaskrifstofu SFS
Sigrún Sveinbjörnsdóttir, verkefnisstjóri á frístundaskrifstofu SFS
Kristín Jóhannesdóttir, skólastjóri Austurbæjarskóla
Berglind Stefánsdóttir, skólastjóri Hlíðaskóla
Arndís Steinþórsdóttir, skólastjóri Háteigsskóla
Ósk Soffía Valtýsdóttir, deildarstjóri USK, Frumathuganir mannvirkja
Guðrún Kaldal, framkvæmdastjóri frístundamiðstöðvarinnar Tjarnarinnar
