„Starfsfólk hreyfingarinnar um land allt, hvort sem það er hjá aðildarfélögum SGS eða öðrum stéttarfélögum eiga ekki skilið að gert sé lítið úr þeirra mikilvægu og góðu störfum, nóg er nú að okkur sótt þótt við tökum ekki þátt í því sjálf,“ segir Flosi Eiríksson, framkvæmdastjóri Starfsgreinasambands Íslands, í nýrri grein á vefsíðu sambandsins.
Starfsgreinasambandið er stærsta landssambandið innan ASÍ og meðal aðildarfélaga þess er Efling. Eins og alkunna er sögðu Sólveig Anna Jónsdóttir, formaður Eflingar, og Viðar Þorsteinsson, framkvæmdastjóri félagsins, af sér vegna ósættis við starfsfólk sem þau segja að hafi unnið gegn sér, haft uppi óhróður gegn sér og ekki verið tilbúin í raunverulega stéttabaráttu. Í viðtali í Silfrinu á sunnudag sagði Sólveig að fyrrverandi formaður Eflingar og starfsfólk félagsins hefðu hrakið sig úr starfi. Farið hafi verið fram gegn henni með ofsakenndum hætti, fáir hafi orðið fyrir jafn grófum árásum og hún.
Flosi segir í pistli sínum, sem augljóslega er að hluta til skrifaður til stuðnings starfsfólki Eflingar:
„Skrifstofur aðilarfélaga SGS eru mannaðar af fólki sem leggur sig fram um að þjónusta sína félagsmenn af kostgæfni og gæta þeirra réttinda, alla daga, allt árið um kring. Sú þjónusta er eitt þeim hlutverkum sem félagsmenn kunna best að meta og sækja mikið í. Við eigum að tala þessa þjónustu upp, vekja á henni athygli og hvetja fólk til að sækja það sem þau þurfa til sinna félaga og taka þátt í starfi þeirra.“
